۱۰۴. سورت الهمزة

وَيْلٌ لِّكُلِّ هُمَزَةٍ لُّمَزَةٍ

د هر هغه چا لپاره تباهي ده چي (مخامخ) خلكو ته د پيغور وركولو او (په شا پسي يې) د بدېو كولو په عادت اخته دی.

الَّذِي جَمَعَ مَالًا وَعَدَّدَهُ

هغه چا چي مال یې جمع کړی دى او په شمار شمېرلو یې ايښى دى؛

يَحْسَبُ أَنَّ مَالَهُ أَخْلَدَهُ

هغه انګېري چي مال به يې ورته تل پاتى ژوند ورکړي.

كَلَّا ۖ لَيُنبَذَنَّ فِي الْحُطَمَةِ

هیڅكله داسي نه ده، هغه به په ماتوونكي، سوځونکي ځای کښي وغورځول شي؛

وَمَا أَدْرَاكَ مَا الْحُطَمَةُ

او ته څه پوهیږې چي هغه ماتوونكي سوځونکي ځای څه دی؟

نَارُ اللَّهِ الْمُوقَدَةُ

د الله اور، ښه لمبه کړای شوى،

الَّتِي تَطَّلِعُ عَلَى الْأَفْئِدَةِ

چي تر زړونو پوري به رسيږي؛

إِنَّهَا عَلَيْهِم مُّؤْصَدَةٌ

شک نشته چي دا اور به ورباندي په خورېدو سرپوښ کړای شي؛

فِي عَمَدٍ مُّمَدَّدَةٍ

(په داسي حال کښي چي هغه به) په لوړو لوړو ستنو كښي (ايسار کړای شوى وي).